تجربتي البسيطه لكيا كادينزا 2013

26 3

لايمكنك التصويت حتى الحصول على 20 نقطة على الأقل
إضغط هنا للإخفاء

فكوك 1684
قبل 9 سنه و 10 شهر

السلام عليكم ورحمة الله وبركاته

قبل ماأبدأ ياشباب أحب أذكر كم ملاحظه :

الموتر كادينزا ٢٠١٣ 
العداد ٤٥ الف
قعدت معي أسبوع وسافرت عليها مسافة ٢٢٠٠ كيلو

البداية :
# العزل جيد بالخطوط ، يعني صوت الهواء خفيف ، اما داخل الديره صوت الارض والكفرات وسط ، عادي مافيه زود
#فيه حاجة أول مره أشوفها بسيارة رخيصه ، وقفت بالخط السريع اصلي ، لاحظت أن الرفرف الداخلي منفك شيء بسييييط من الهواء
المهم يوم جيت اعدله ويوم لمست البطانه الداخلية اكتشفت انها بلاستك + قماش لعزل الصوت ، مثل نوعية القماش اللي بالشنطة (صوف) !!
بصراحه هالشغلة تدل أن كيا جادة بتطوير منتجاتها لتنافس
من كان يصدق أن كيا اللي نستهتر فيها عام ٩٨
هي كيا اليوم ؟


الإيجابيات :
1 - السيارة صاروخ أرض جو ماشاءالله ، ٦ سلندر  ٣.٥ لتر ، و ٢٩٠ حصان ، أكبر وأقوى من الأزيرا 
لدرجة أخذت مخالفتين سرعة وانا مسافر
2 - سعرها منافس بقوة ، حاليا ٢٠١٤ ستاندر تبدأ من ٨٥ ، سعر ممتاز لعشاق ال ٦ سلندر 
3 - شكلها مميز ، وفخم وملفت للنظر ، تصدقون وأنا مسافر أكثر من واحد كان بيسقط علي بعدين يهون
ويللللصق وراي عشان يتعرف على السيارة !!
وبعضهم يتعمد يسقط علي بشويش عشان يتأمل السيارة
4 - فيها ميزة تريح العين بالسفر بالليل ، وهي إمكانية تشغيل المسجل والشاشة طافية
 

العيوب :
1 - المكيف بوسط الديرة مش ولابد ، يمكن عشاني متعود على الياباني ، أما بالخطوط ممتاز
2 - فيه حاجة ضايقتني ومدري ياليت أهل الكادينزا يفيدوننا ، فيه لمبة خااافته
موجهه الى الاكواب اللي بين السواق والراكب ، ماتنطفىء أبدا !!! 


الخلاصة :
اذا كنت تحب تتميز بالشارع ، ومن ضمن شروطك مكينة ٦ سلندر ، وماعندك استعداد تدفع أكثر من ١٠٠ الف
ولايهمك السعر عند البيع ، خذ كادينزا ، وحافظ عليها ، واحرص على معرفة تسعيرة قطع غيارها
حتى سمعت ان بعض قطع غيارها مشترك مع ازيرا ، وهذي نقطة ايجابيه

أنا عن نفسي أفضل طريقه تاخذها ماشيه اقل من ٣٠٠٠٠ مثلا
بتاخذها ببلاش وبنفس الوقت اخت الجديدة

نقطة أخيرة :
يوم اخذت السيارة ، لاحظت بعض الاوقات ان لمبة الزيت تولع احيانا لحظات بسيطة وتطفى
طبعا عندي خلفية جيدة بالميكانيكا نوعا ما ، شيكت على عيار الزيت ممتاز
صوت المكينة ممتاز ، العزم ممتاز
يوم علمت راعي مكتب الايجار (سعودي) قال : ياخي هذي ثاني كادينزا فيها هالمشكله
والاولى غيرنا فيها طرمبة زيت ، وهذي اللي معك بنغير طرمبته
سألته وش تحط زيت ؟ قال ماادري 
خلى العامل يجيب الزيت وطلع     W 20 - 50
قلت له ياخي الموتر جديد وهالزيت مايحط الا على السيارات التعبانه
قعد يتشكر
النقصود هنا السيارة مالها علاقة بالمشكله ، المشكلة بالمستخدم ؟؟



تقريبا هذا اللي أتذكره من تجربتي
واعتذر من صاحب السيارة ، اخذت الصورة من النت
وشكرا

إبلاغ

الردود