اوبتيما 2015 استاندر

السؤال الاول , بخصوص مثبت السرعه تقدر تسأل نفس البايع لانه ابخص

الثاني : هي نفس السوناتا , وتنفع , مع ولد عمي النترا 2014 وماشاءالله نتفها في الخطوط صحيح ممكن مراتبها قاسيه لكن في الاخير ما هي المانيه

الثالث : الاي بي اس كنت انصح الكل انه ياخذه , وقبل 3 ايام تفلت على الاي بي اس ههههههه , خلاني اصدم واحد ثور ( الله اني صايم ) متعطل وموقف سيارته بوسط الدائري حسبي الله عليه والمشكله السياره لو ان مافيه اي بي اس كان مسكت وما صدمته لكن مشكلتها تفك وتمسك تفك وتمسك وهذا هو سبب الحادث

فماهو ذاك الاهميه يعني ان جاء جاء وان ماجاء عادي وللعلم هو على بعض السيارات يكون جيد وعلى البعض الاخر يكون سيء

السؤال الرابع : سيارتك وكاله , ما يحتاج صيانه الا بعد 100 الف , يعني خلال هالـ 100 الف غير زيت وفحمات وبواجي واتوقع رخيصه لانها مثل السوناتا

5 : انا اشوف المازدا هي الافضل من بينها بحكم اني مجرب مازدا وممتازه جدا ولله الحمد

ما قصرت ي ( ابو يزيد 000 ) على المعلومات بسس ياخي فيه ناس تمدحها وناس تسبها من ناحية قطع ووكيل ,, و كثيرة هالايام نشوفها بالشارع وبالاخص الاستاندر 

لكن الله يكتب اللي فيه الخيره 


طيب هل فيه فرق بين 2000 cc و 2400 cc بالخط ??

اللهم *

واقصد المازدا 6 2015 ب 66 الف او 67 الف بالوكاله ويمكن المعارض اقل

والله المازدا دروت عليها ب حفرالباطن ما حصلتها واللا هي ونعم السياره والله ,, 
واذا بغيتها وكالة لازم تحجزها وتاصل لك بعد شهرين وانا محتاج السياره الايام هذي قبل العيد 

شف نصيحه اخويه مني لك

معي جيب مازدا نص فل ومع عمي فل كامل

هو دفع رباعي مستمر وانا دفع امامي فقط

هو جنوط 20 وانا جنوط صغيره خايسه

وكنت بابيعه واخذ فل كامل

ويوم جربت حق عمي قلت وين جيبي بسس ردووه لي

والله الجيب حقي ناعم الحمد ماهو مثل حق عمي قاسي

فالاستاندر احسن لك من الفل كامل لان مقاس الجنط يفرق وكذلك يفرق اشياء ثانيه مثل المساعدات واليايات وتكون قاسيه الفل كامل دايم

وانا معي مازدا والله وكيلها بطل وانا بالرياض ما ادري عشاني بالرياض وكيلها بطل ولا لا , على طول القطع متوفره ولا عمري طلبت قطعه وجتني بعد , واصلا الحمد لله طلباتي قليله جدا , طلبت 3 مرات فحمات سعر الطقم امامي وخلفي 550 ريال ومكينه القزاز لان فيه عيب مصنعي ب 275 ريال , وزيت قير 4 علب العلبه ب 55 ريال المجموع 220 ريال

وسيارتي الان فيها صدمه على الابواب سالت عن الابواب قالوا لي ب 1100 الباب الخلفي والامامي 1150 وبالشرقيه يقولون 950 ريال الباب والصدام الامامي اللي صدمت فيه بالدايري والحمد لله ما سار الا قطع خفيف و كسر بالشبك وسألت وقالوا الشبك كامل 700 ريال و الصدام ب800 ريال

يعني اسعارها معقوله والله

شي كويسس والله لككن المشكلة انهم يطولون على ما يوفرون السيارة و حتى الان مالقيت معرض يبيعها 

و اشكرك يابو يزيد على ردك السريع جزاك الله خير 

وياك يا الغالي وترا الابتما ما يعيبها شيء ان كانها معجبتك بس ينقصها الجنوط المكحله وتطلع مزيونه :)

سعر المازدا 6 في المعارض اعلى من الوكاله بسبب (عدم توفير الوكيل لها الا بعد شهرين)
مع خويي اوبتما يداوم عليها كل يوم ماشاءالله 
هذا كل اللي اعرفه عن هالسياره وهي اخت السوناتا اتوقع حتى في القطع

الاوبتيما سيارة ممتازة وعملية ومثل ماقال بندرا هي اخت السوناتا وانا من ناحيتي الشخصية في الشكل الجديد تفوقت على السوناتا رغم ان اغلب الناس يطلع السوناتا لكن بوضح لك ليش الاوبتيما افضل


1- انها اقولا بدي من السوناتا وأرسى في الخط
ثانيا ان مراتبها اريح من السوناتا ولا طلعت فيها اي مشاكل ولحد اشتكى منها




لكن عيبها الوحيد ان وكيلها منتهي الجبر الله يعينا عليه بعض القطع مايوفرها لازم طلبية انا امتلك كيا اوبريس 2009 اغلب القطع موجودة لكن بعضها اجلس 2 الى 3 ايام على ماتجي وما اعتقد ان هاذي بترددك لأن الموتر جديد ووكالة ماشاء الله وسنتين ولا 3 سنوات منتاب حاط فيه شي ان شاء الله


والصيانة اسحب على الوكالة شيك لين 10 الالف بالكثير وبعدها واضب على تغيير زيتها عند بترومين ولا بنشري كويس وانتهى الموضوع

تدرون وش اللي كرهني فيها منتشره مع السرابيت والمفحطين بكثره واللي ساكن بالرياض يلاحظ هالشي
شف لك موتر غيرها مثلا مازدا 6 اطلق منها 

يا مالك رجا لو بتنظر للنظرة هاذي عز الله ماشريت ولا موتر ولا كل موتر بتشتريه بتطالع منهو معه

اكبر مثال الددسن انت شايف اغلبها منهو معه بدون ما اذكر اسم وفيه ناس بحاجة الونيت يعني ما اطلعه عشانهم ولا اجبر نفسي مثلن على هايلكس ولا ايسوزو وانا ما ابيه هاذا مثال طبعا


طيب على عز الكرسيدا عام 80 بداية 90 كانت منتشرة مع المفحطين وفيه شيبان يشترونها


اهم شي السيارة تخليها على وكالتها ولا تفكك طيس ولا تظلل 0 ثمنطعش ولا عليك من أحد

وان حصل يا صاحب الموضوع طق لها جنوط اول ما تطلعها عشان يطلع شكلها احلى ومنها الجنط بيكون ارسى واثقل للسيارة

انا بالنسبه لي تهمني مثل هالامور يعني ما ابي اتقروش من الدوريات كل دوريه توقفني ولا ابي اجلس الصباح واحصل السياره على بلكات.. 

بالنسبة لمثبت السرعة ما أظن فيها بس يركب عليها عادي

abs ماينفع الا اذا فيه هامش مناورة يعني مو مثل الاخ الى صدم بدايري تمسك فرامل وتبقى تمشي سيدا 
abs حاطينه اشان السيارة لاتفحط وتقدر تناور فيها اما بدون بس تناور تلاقيها تفتر لك 

جزاكم الله خير ما قصرتم جميع و ان شاء الله أني بشتريها والله يكتب اللي فيه الخيره 

طيب  

فيه فرق بين 2000 cc و 2400 cc 
في الخطط ؟؟

فيه فرق بين 2000 cc و 2400 cc ???????????

ابو يزيد انت اللي مسوي الحادث في الدايري الشرقي على خط المطار برياض ؟؟