أضف سؤال أو موضوع جديد          

عيوب بسيارتي وطلعت كلها وسوسه وتصليحها كلف 15 ريال_لا توسوس

up 34 down 24
ابو يزيد 000 8688
قبل 2 سنه و 4 شهر



السلام عليكم ورحمة الله وبركاته
كيفكم عساكم بخير

توضيح قبل كل شيء لان فيه ناس فهمتني غلط ( الصور من قوقل ) عدا اول 3 صور , يعني صفوا النيه الله يسعدكم ولاني من راعين هالحركات 
انا شخص اعجبتني هالسياره وشريتها , فلا تساووني مع الحثاله اللي يستخدمونها استخدام غلط ( تفحيط او XXX )
سيارتي ستوك شلت التجاليد من خامس يوم وبدون تضليل لسعتني الشمس لكن عشان لا اتشبهه بالحثاله وعليها الطيس
وانا ناوي قبل اشتريها اني اعدلها فل لاني انسان احب ابعد عن الشبهات بقدر الامكان , لان هالمواصفات شبهه
 وتم حذف الصور الشبهه عشانكم تحسبونه انا , وبقي بعض الصور , واعيد واكرر ماهي لي الصور 


أبشركم بفضل من الله شرينا اوبتيما 2014 مكينه 2400 سي سي استاندر شكمانين ارباقين مثبت تحكم كامل من الدركسون وقير F1 خلف المقود ودركسون جلد وقير جلد ودعاسات البنزين والفرامل سبورت ومخرج USB , AUX وبلوتوث وقير توب ترونك 6 تعاشيق , طيس , البعض يسميها نص فل بدون بانوراما والبعض يسميها الفئه الثالثه والبعض يسميها استاندر  مكينه 2400 والبعض سبشل , مالها فئه معينه :)
السياره مثلها مثل السوناتا
نشيطه وصرفها للبنزين (معقول) و المكيف (بارد جدا) وعزلها (جيد) وعزلها الارضي (لا بأس به) وتحملها( ممتاز جدا )وجوده الديكورات (ممتازه) ومافيه اصوات لا من خارج السياره ولا داخلها الحمد لله مع ان ممشاها فوق 50 ألف كيلو وهي 2014 سياره (عمليه ورخيصه) , مناسبة جدا للشباب , كفائتها بنفس كفاءة ( السوناتا ) حتى الفئات والمحركات نفس السوناتا


طبعا قطعها كامله عدا قطع البودي مثلها مثل السوناتا بنسبة 95%
رح افحص سيارتك , وخذ رقم القطعه اللي تحتاج تغير واطلبها من قطع هونداي وراح يجبونها لك

السياره الحمد لله شريتها وانا من طبعي حريص جدا و الحرص الزائد ايضا مشكله بالوقت نفسه 
طبعا تم فحصها كمبيوتر والحمد لله مافيها عيوب , مجرد امور استهلاكيه
مثل فحمات خلفيه مع خرط هوبات وشد الجلنط وتغير زيت المكينه , وزيت القير على هالممشى وكفر يسار

اول ما طلعت السياره من المعرض كنت ما اتعدا سرعه 40 تو السياره جديده ( صحيح مستعمله لكن بنظري اخت الجديده ) 

وطلعاتي في الايام الاولى قليله جدا , من البيت للبقاله , للمسجد وارجع 
ما جربتها خط , ويوم جربتها على الدائري ومشيت فوق 80 كم بالساعه

سمعت صوت تنسيم قوي جدا جدا من القزاز الامامي !! واسمع صوت غريب كانه ونه ( حنه )
وادق فلشر واجنب يمين وافتح الكبوت واشيك على موية الرديتر و اشوف القزاز الامامي لا يكون منكسر
ومافيه شيء , ومشيت مره ثانيه و نفس الحاله وسار الصوت يطلع من على 60 كم بالساعه 
صوت تنسيم قوي جدا مع صوت غريب يشبهه للونه واحسبها من المكينه ( كأنه في شيء مكتوم )

واروح لاخوي و اقعد اسب في الموتر واقول ابوه من موتر توه جديد وكذا يسوي فيني

وأقول الناس نصحوني من قبل الكيا ما ينفع لكن انا دايم احب اجرب وبعدها احكم وهذا اللي ضيعني وياليتني ما شريتها وياليت وياليت , لاني دافع فيها مبلغ وقدره , صحيح مبلغ عادي , لكن برضوا ترا هالفلوس جت من تعب وكد , واسب في الفحص واقول حسبي الله ان كانت هالعيوب فيها ولا طلعوها لي بالفحص وحتى كيف هالعيوب والسياره توها جديده اكيد من راعيها الاول , تنسيم وحنه بالمكينه !! ولا يطلعها الفحص , المهم كبرت السالفه , واللي يعرفوني بلغتهم من هالسالفه وانا مغبون , كبرتها يا ناس

وهداني اخوي وقالي تعوذ من ابليس , وطلع يجرب السياره معي , الا والصوت سار من  50 كم يطلع  , وشوي اخوي يفتح القزاز و  يسمع مصدر الصوت من فين , الا ويطالعني بنص عين وهو معصب !! واقوله ما الومك والله , ادري انك معصب من هالخايسه , وما ادري الا باخوي كان بيدخلني تحت المرتبه هههههه 

طلع السبب من تجاليد الوكاله اللي ( بالسقف ) , لا بارك الله فيها , خوفتني وظلمت هالسياره ههههه

طبعا انفكت من الامام من عند القزاز الامامي, وسارت تطلع صوت , وطبعا من داخل السياره يطلع كانها صوت تنسيم هواء وضربات مطر على السياره وانا احسبه تنسيم بالقزاز لانها انفكت من طرفها من عند حافة القزاز الامامي ,وايضا ينكتم الهواء او ينسد تحتها فيطلع صوت غريب وانا كنت احسبه ونه من المكينه , وطلع الامر بسيط وفيكتها بنفسي ما كلفتني بشيء

المشكله الثانيه : مباشره اكتشفتها يوم كنت اعدل شماغي , الا والموتر يروح يسار بقوه !!
فيه حذفه قويه يسار , ما يمديك تشيل يدك عن الدركسون الا وهي داخله بالمسار الايسر
طبعا انا قلت يمكن سببها الكفر الايسر لانه طلع بالفحص انه يحتاج تغير 
لكن كمان لاحظت نفس الدركسون يلعب !! ماهو موزون تحس انه فيه فراغ وجالس يلعب يمين يسار بشكل خفيف
لازم تكون ماسكه بيدينك الثنين , لانك اذا فكيته راح تحذف يسار + يلعب ماهو راسي , يقعد يتحرك يمين يسار بشكل خفيف لكن مخيف !! مع العلم كل كلامي على سرعات بسيطه ماتتعدا 80 الى 100
حتى لو اخذت لفه يوتيرن , ما يرجع الدركسون طبيعي من حاله , لا , يقعد يرقص يرقص لين ما يتعدل , تحسه يلعب يمين يسار ويتنافض ما ادري وش سببه !!

فقلت مستحيل تكون هالمشاكل اللي هي ( الحذفيه بقوه لليسار + الدركسون يلعب ويهز يمين يسار على اي سرعه من صفر الى مالا نهايه + ماهي راسيه لو فكيت الدركسون تلعب عليك وتحذف يسار لازم تكون ماسكه زين عشان لا يهز ويحذف ) فقلت مستحيل يكون سببها كفره !! مستحيل 

وجيت اسب هالموتر مره ثانيه و كبرت السالفه , واقول اكيد ان العكوس الاماميه معدومه و اكيد ان الشاص فيه ضربه من تحت او الاذرعه تحتاج تغير والفحص ابن ( !! ) ماطلع هالعيوب !! حسبي الله عليه ونعم الوكيل

وجالي قريبي هداني , وقال انا شفت موترك نظيف وما يشكي من شيء
انا متأكد لا فيها شاص ولا فيه ضربه من تحت ولا فيها شيء بالاذرعه
رح بس رصصها ارضي سعره 120 الى 150 ريال
وشوف تحتاج فقط وزن اذرعه ب 100 ريال
ومره وحده شيك على علبة الدركسون والزيت حقها + وشيك من تحت الكفر الايسر وشوف وش تحتاج يمكن امر بسيط جدا

انا شلت همها واقعد اقول يالليل هالسياره واسب فيها
ويجيني اخوي ويقول وش اللي طلع لك بالفحص , قلت الكفره يسار تحتاج تغير ,  واصلا الكفرات الاماميه معدومه
قال طيب , ما بنخسرك و نغير كفره يسار وممكن تزبط ويمكن لا , خلنا نبدل الكفرات الخلفيه والاماميه
لاني فعلا ملاحظ الحذفيه وعدم التوزان في الدركسون وماهي راسيه
لكن بنبدل الكفرات الاماميه بالخلفيه , والخلفيه بنحطها قدام , لان الخلفيه نظيفه جدا والاماميه معدومه

والله ياشباب اني ما اكذب عليكم , كان سبب هالمشكله , والحذفه يسار و هزه الدركسون ومافيها رساوه ولازم تكون يدي على الدركسون لاني لو فكيته راح يقعد يهتز الدرسكون وتحذف السياره

سببها كان فعلا الكفرات الاماميه , فقط نقلتها ورا , وحطيت اللي ورا قدام 

الحذفيه ولله الحمد اختفت ما عادت تروح يسار , الهزه اللي كانت واضحه بالدركسون راحت , افك الدركسون ولا يهتز الدركسون او يرقص , وسارت السياره راسيه , اشيل يدي عن الدركسون تكون في خطها ماتلعب , لا اخذت يوتيرن , الدركسون يرجع ولا يقعد يرقص , لا الحمد لله , وتحسها سارت راسيه وثقيله وزدت هواء الكفرات شوي

فخلاصه موضوعي , احيانا الحرص الزائد , يتعبك في فكرك و في جسدك , يقعد بالك مشغول , وايضا تنهك جسدك بانك تدور حل لهالموضوع وانت ما عندك احيانا الخبره الكافيه , فاستعن بعد الله سبحانه , بناس عندهم خبره بالهمجال وخلهم يفيدونك , ولا تكبر السالفه , حاول اول شيء تلقا لها حل وتعرف المشكله , بعدين احكم اذا هو عيب كبير او بسيط ,
انا استحيت والله سبيت بالهسياره وماخليت احد الا وقلت له وطلعت مشكلتها الاولى لزقات الوكاله اللي بالتنده والمشكله الثانيه الكفرات بس نقلتها ب15 ريال

فهذي تجربتي وحبيت افديكم فيها , وان شاء الله اكون افدتكم , و لا تسوي من شيء صغير ( مصيبه وكارثة ) وفي الاخير تحرج نفسك , اول شيء اعرف وش السبب وبعدها احكم , لا تتسرع بالحكم مهما كان , ولا تكون سلبي , بس تدور السلبيات وتنسى الميزات , وايضا حتى لو صادفتك سلبيات ممكن سببها بسيط فلا تكبر الموضوع وتشغل نفسك وتشغلك غيرك معاك 

ملاحظة فقط صور التجليده للسقف + الكفرات ( لسيارتي ) والباقي من قوقل :) 

تحياتي لكم / اخوكم ابويزيد





















إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


 الف مبروك يابو يزيد الف مبروك الله يعطيك خيرها ويكفيك شرها 
والوسوسه طبيعي وانا اخوك ماحد انولد مايوسوس بشيء طبيعي هالشيء وحافظ عليها سيارات لها هيبتها والله يوفقك


up 1 down 0
احمد شريف 3176
قبل 2 سنه و 4 شهر



الله يعطيك العافية
وبالنسبة لاهل التجليد ... ما اقول الا الله يهديهم ... يحسبونها حركة وهي مضحكة


up 1 down 0
turkiq 162
قبل 2 سنه و 4 شهر