أضف سؤال أو موضوع جديد          

ليلة هروب التريلة الي صدمني - وسرقة جوالي - وتكذيب امن الطرق

up 19 down 8
YASSER505 4154
قبل 2 سنه و 9 شهر



السلام عليكم

من زمان عنكم ياولد هههههههه

المهم

الحمد لله اولا واخيرا والله يعوضني ويعوض الجميع خير من الي راح


بداية على وقت المطر الاسبوع الماضي بالرياض، تعديت كبري الفحص بالغلط ومفروض اديور منه وتعديت المخرج قلت ياولد خلني اشد لمحطة هلا عندهم مقهى هناك يصلح لك احلى عدني
المهم
تعديت كبري الفحص ومخرج الثمامة وقبل المحطة بشوي الا تريله ترقص عرضه وسامري "زلقت من المطر " ههههههه بعيده مره عني وعن التريلة الثانية الي جنبي , المهم الي جنبي شاف العرضه قدامه قام مسك اووووم الفرامل وسقط يسار وانا بالصغيره امسك فرامل مافييييه طععععععععععع واخش بمؤخرته المصونه , وقلت ياليل الزق الحين الغلط بينحط علي , والا اخونا بالله يطلق كفراته للريح وينحاش مع اني " مرورياً " غلطان لكن " فعلياً " هو , والزبدة صادف وجود امن الطرق بعد مكان انزلاق التريله بشوي وقمت حركت له والسيارة تهربد ,
شوي قال لي خير وش تبي ,, والمطر يصب ,, قلت مدري وش اقول , قال اخلص علينا قلت صدمت بتريله وانحاش قال ويييش ؟؟؟ وجلس يضحك ولطعوني لين سحبوا التريله الي رقصت بالشارع وقال شف الرقيب حقنا يقول لاتعطونه شي هذا صادم بالرياض ويبي تقرير من عندنا ,, ويسحبون على اومي ويخلوني , وادق عالمرور ع اذان العشا وربي ماحد جاني الى الساعه 11 كلمت امن الطرق وجو وقالوا بناخذ السيارة لمركز سعد نكتب التقرير هناك واسحب السيارة بالسطحه معهم وانلطع الى الساعه ثلاث الا وبعدين سجلوها واقعه امن طرق لان المرور ماكان موجود عندهم وانواع الحوادث " سمعت بالجهاز عندهم انوووواااع الحوادث والاصابات والوفيات بس ع طريق الدمام "

المهم بعد يومين رحت لمرور الشرق ,,


وانبسسسسطت مكتب 3 فاااااااااااااااااضي واخذ تقريري منهم ومبسوط على كلمة " هرب هرب هرب " مسجله كذا بالتقرير ههههههه
وقلت خلني اصورها لاخوي وصورتها وحطيت الجوال جنبي وقلت ابختم ورقة الاصلاح وختمت الورقة وديورت ,,
وجيت ابركب السيارة واتذكر جوالي عالطاولة :( :( :( :(

وارجع ركضضضض واصيح جواااالي والا تشتغل شيلة " ياحسرررتي ياوجوووودي " :( رااااح الجوال رااااح واطلع جوالي الثاني واحدد موقعه ,,, ابن الكــــلــ .... الي سرقه شق اوووم الشعيب برا المركز وامحط الجوال بفورمات عن بعد .
وكان لازال عندي امل رغم اني شفت الجوال يطير برا جلست ادوره لين انتهى الدوام ,
راح اهم جوال عندي وفيه سيرة حياتي السامسونقية " متعوب عليها " من عام 2010 الى يوم السرقة
لكن الفضل لله ثم لبرنامج اندرويد ديفايس مانجر الي يخليك تحدد الجهاز وتفرمته عن بعد ولا كان شاف فضايحي.
المهم واطلع
وانا ماشي اسمع ول ول ول ول بالكبوت وشوي الا تصير صوت تصفير شوي الا توقف السيارة بنفسها كاني شاد الفرامل , وامشي مافيييه الضغط يرتفع لكن ماتتحرك واطفي واشغل نفس الشي قلت يلعن ام النحس الي كذا ياشيييخ واصبر حدود ربع ساعة وبعدها شغلت ومشيت وانواع القرقعه , قرررقععععع قرررقعععع وامشي وكل ماسرعت يخف الصوت لين وصلت قسم الشرطة ووقفت حدود ساعتين وبلغت وخلصت وطلعت والحمد لله خف الصوت والسيارة رجعت طبيعية بشكل كبير


اسف عالاطالة
لكن
انتبه تحط اغراض بجوال مو مقفل لان الحرامية حتى بدار الامن " المرور " يسرقونك
اذا صدمت لاتتحرك شبر من محلك " عرفت ليه حقين التكاسي مايتحركون من اماكنهم وقت الحادث "

فعل خدمة تحديد الموقع بجوالك سواء أي فون او اندرويد لانها تفيدك جدا جدا جدا اذا انسرق جوالك او ضاع.


وبس
والحمد لله اولاً واخيراً







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


حياك الله يا ياسر

النظام القديم للحوادث لو صدمت احد من ورى انت الغلطان مهما كان 

ما فيه تفاهم صدمته من ورى انت الغلطان

حاليا النظام مختلف حتى لو صدمته من ورى و هو اللي دخل عليك بمسارك هو الغلطان


up 4 down 14
التركي 1403 195
قبل 2 سنه و 9 شهر



لو ما قفلت الخط وقت الحادث وسويت زحمه والله ان تجلس يومك كله للاسف المرور في السعوديه افشل مرور علئ وجه الارض جاء الزهراني وكنا املين فيه خير بس طلع راعي قسايم علئ تضليل واستماره






up 13 down 7
الفرنتي07 67
قبل 2 سنه و 9 شهر



الحمد الله على سلامه  اهم شي سلامه الواحد يمكن وقت الامطار البلاغات كثيره وحوادث كثيره بس مفروض يكونون عارفين النقطه هذي مو اذا طاح الفاس براس يتحركون 
 انا اذكر  وقت الامطار خويي متصل علي يقول جاي من القصيم وجيت طريق خريص الى قدامي زحمه  والسبب سيول الناس تغرقت سيارتها واشوف الناس تعكس السير وفيه واحد سعودي يمشي برجوله وساله خويي قال  نصيحه ارجع سيارتي غرقت 

 ويرجع ويعكس السياره واقرب محطه وينام 5 ساعات وبعدها يصحى الى الاجواء هدت وراح بيتهم 


up 4 down 4
سكودر 14896
قبل 2 سنه و 9 شهر



الله يعوضك خير يا ياسر 


وبالنسبه لك يا الفرنتي

بدون ذكر قبايل معينه في تعليقك , لان بكل قبيله الطيب والبطال .. 

وقبل كل شي هذا عمل وانظمه تخالفها تستاهل المخالفه / سواء كان زهراني او غامدي او غيره 
لو تركك فهي جماله منه لكن لو خالفك ماتعتبر مثل ماقلت راعي قسايم 
يعتبر شي طبيعي جدا 




up 3 down 15
a v a l o n 2183
قبل 2 سنه و 9 شهر



اقسام المرور والشرطه فيها كمرات كان طلبت منهم يشوفون من سرق جوالك


up 4 down 0
Pro rare 448
قبل 2 سنه و 9 شهر



الحمدلله على سلامتك 

والله يعوضك بموترك والجوال 


بس معقوله المرور اللي راجعتهم مافيه كاميرات ويدلونك على اللي سرق الجوال 

حسبي الله على اللي تمد يده للحرام 


up 1 down 0
aboahmed2014 599
قبل 2 سنه و 9 شهر



الكاميرات بقسم التجديد فقط 
انا كنت بقسم الحوادث


up 0 down 0
YASSER505 4154
قبل 2 سنه و 9 شهر