لمبه الزيت ولعت

انتبه انا صارت معي وخبطت المكينه 
الشباب يفيدوك ان شاء الله 
والأغلب انها طرمبه زيت دفعها ضعيف 

اول شي انك ماتمشي ع السياره
وسطحه على الوكاله باقي ع الضمان ماشيه60
وبيعرفو اذا طرمبه زيت ضربطت او فلتر او حساس
لانه ماتشتغل الى في عيب لاتشغلها

1- اذا السيارة على الضمان خذها للوكالة.
2- لمبة الزيت ماتولع عند انتهاء صلاحية الزيت او النقصان البسيط.
3- اذا خرجت من الضمان زالزيت عندك مو ناقص, افحص حساس الزيت (ساعة الزيت) هذا اذا خرب اللمبة تولع على طول, والسبب انه لو خربت والزيت نقص من جد ماراح تعرف.
4- افحص فلتر الزيت الداخلي( هذا يتنظف او يستبدل) وتكلفته اقل من تغير طرمبة.
5- غير طرمبة الزيت رغم ان عمرها الافتراضي بدري عليه.
معلومة اذا استخدمت السيارة أكثر من ساعة واللمبة والعة ومافي اي صوت فتقريبا مو من الطرمبة, لأن لو الطرمبة خربانة المكينة بتخبط. وشئ ثاني اذا شغلت السيارة وفي احد معاك يدعس بنزين افتح غطا الزيت وشوف اذا في زيت يطلع على شكل رذاذ, يعني الطرمبة شغالة.

غيرت الزيت والفلتر من شويه والعلامه تعلق بعد التشغيل ثانيتين وتروح وماترجع والوكاله ملاعين لو رحت لهم يبغو اثباتات وانا بغير ببنشري طبعا مع انه الفلتر اصلي من الوكاله بس انتم عارفينهم .. وامرهم الوكاله بحاول السبت لانه السياره بستخدمها يوميا عملي بعيد 90 كيلو رايح و90 جاي وبكره مداوم وبعده وبرضه صوت المكينه طبيعي جدا وللان ماحركتها

ياغالي ياما وياما نصحنا مستخدمين هونداي وكيا ابعدو عن زيوت كاسترول بجميع انواعها تراها العدو الاول لمكاين الكوري لكن لاحياه لمن تنادي !!!

اقوله يامسلم لو معك تويوتا لو معك امريكي او كوري قديم غير كاسترول والقلب داعي لك اما الكوري 2011 وفوق ابعدها عنه ياولد .. يرد عليك رد مثل وجهه يحسسك انك جاي تنصب عليه مب جاي تنصحه لوجه الله

اخر واحد معه سوناتا وقلت له ابعدها عنه قالي انا استخدمه من 3 سنين ولا شفت الا كل خير ؟ اما التفكير الغبي يعني لازم تجيك مصيبه على راسك وتاكلها علشان تقتنع ؟؟؟ يقولك المثل السعيد من وعظ بغيره والشقي من وعظ بنفسه

بالنسبه لي انا استخدم فوكس تيتان سوبر سن او موتر كرافت 5w30 من يوم شريت الموتر ولله الحمد .. بس الفرق الاول تخليقي بالكامل يمشيك من 8 الى 12 الف كحد اقصى .. الثاني نصف تخليقي حده من 5 الى 7 الاف بالكثير واظنك شفت موضوعي وعلقت عليه اللي عنوانه (( مهم جدا .. خبرة 5 سنوات ف استخدام الازيرا والكادينزا ))

اخي الفاضل انت بمواضيعك كاتب ابعدو عن الكاسترول 10/30 الGTX فقط وانا ذكرت اني استخدم 5/30 ماجناتيك !!! عالعموم دام انك مخضرم هل الكادينزا من السيارات اللي تدخل بدون موعد الوكاله ؟

عندك ضعف في طرمبة الزيت أو السيفون تعبان لو حبيت تتأكد أفتح غطاء الماكينة وشغل السيارة وشوف الزيت أذا يتطاير أمورك سليمه أنت غير السيفون أصلي وغير الزيت لو ماراحت المشكلة الطرمبه ضعيفه

ممكن شخال الزيت متسدد لازم تختبر هل الزيت يطلع فوق طبيعي 
اوغير السيفون ممكن هو متسدد لازم يفحصها مكنيكي يفهم 
انصحك تشيله بسطحه

نعم الله يحفظك انا تحذيري عن زيوت كاسترول بأكملها خصوصا GTX لان تصنيفه قديم SL اما الجديد مثل ماجناتيك وايدج تصنيفه SN لكن للاسف صناعه اماراتيه (( ماخرب مواترنا غير هالدوله ذي ومعاها الصين ))

حط ببالك كثيررر من زيوت كاسترول بالسوق مغشوشه ولو لاقدر الله جاء موترك شي ورحت اشتكيت وكيل كاسترول بيقولك ماعنديلك سنع انا وكيل كاسترول السعودي اللي هو GTX فقططط اما ماجناتيك رح طارد ورى وكيله بالامارات

زي سالفه كفرات الجنسيس 2015 كانت تنفجر من دون سابق انذار وصناعتها دانلوب اماراتي (( وليس ياباني )) خاطبو الوكيل ابن زقر بالسعوديه قال مالي دخل ذا وكيلها اماراتي .. خاطبو وكيل الامارات قال برضه مالي دخل انا ضماني فيه شروط ومن ضمنها الاستخدام داخل حدود دوله الامارات فقط

وراحت مطالبهم بالهواء .. انت قارن بين بطاريات اي سي ديلكو يوم كانت امريكي وبعد ماصارت اماراتي وشوف الفرق .. اقل شي قارن بين زيت اي سي ديلكو 5w30 الامريكي اللي تجيك علبته اقل من لتر (( 946 مل )) ومابين اللي تجيك لتر كامل 1000 مل صناعه اماراتيه وشوف الفرق بنفسك .. اذا انت مصمم على كاسترول ماجناتيك وماتبي غيره خذه من وكاله مازدا علشان تضمن انه اصلي .. بتقولي اعرف موزع للماجناتيك واتعامل معه من سنوات انت بكيفك عندنا واحد بالقروب من اهل الطايف قال نفس الشي وراحت مكينته تخبيط .. تبي رقمه ارسلته لك خاص وخذ العلم منه .. اما استفسارك عن الجبر لا اكيد لازم موعد كل مواتره كذا ماعدا الكوريس

ياليتك تغير الزيت والسيفون وتفصل اصباع البطاريه وترجع تركبها وتشوف

ادائما ابدأ بالحل الاسهل ف الاصعب قبل ماتخسر قيمه طرمبه كامله .. واذا تبي تشيلها للوكاله براحتك

ع فكره مرة صارت معي كنت بلفه ودعست وطلعت لمبه التحذير

وتوقعتها لمبه التشييك .. المهم كنت مصور فيديو يوم راجعته اثرها لمبه الثبات الالكتروني اللي عباره عن سياره مايله ووراها خطين

الأخ كامارو28
انت تقول حاليا بعد تغيير الزيت والسيفون علامة الزيت تجلس شغالة حدود ثانيتين بعد التشغيل وتختفي ماعاد ترجع
اذا الوضع حاليا كذا معناه طبيعي وماعندك مشكلة الا اذا رجعت العالمة تشتغل أثناء استخدام السيارة

زيت كاسترول  للاسف اسوء انواع الزويت وماشي بالدعاية والتسويق 
بالنسبة للمبة سالفة تعليق يمكن طبيعية  واسهل طريقة دور على مقطع كادينزا وشوف الطبلون اذا اشتغل 
انا عندي لمبة حزام الامان تقعد دقيقة بعدين تطفي وبعد ما قريت تاكد انه نظام الفورد كذا

تحياتي لكم جميعا ماقصرتو للراحه بكره بمر الوكاله .. في احد يعرف اقرب فرع صيانه لابحر في جده ؟؟ واعتذر مني قادر اعطيك لايك كلكم مايرضى اكثر من 7 .. تحياتي

شيك على ساعة الزيت.

تم تغيير الحساس عالضمان وقيمته 80 ريال للمعلوميه فقط لكن مكانه صعب تحت الثلاجه وبعدين ما انحلت المشكله وتم تغير طرمبه الزيت برضه عالضمان والحمدلله امس استلمتها والى الان الامور تمام