صيانة وكيل كيا الجبر سيراتو أربعين الف

والله يا اخي اشوف السعر مبالغ بصراحه يعني مثلا :
1- زيت المكينه هيلكس التخليقي لزوجه 5W-40 اذكر اني شاري العلبه بي 21 ريال من محلات الجمله والسيفون اضن بحول ال35 ريال تقريبا والتركيب مايتجاوز ال 25 ريال عند اي بنشري
2- بالنسبة لمويه الرديتر مايتعدى تغيرها 50 او 60 ريال بالكثير
3- البوجيهات المفروض ماتتغير الا على 40 او 50 الف كيلو وتكلفتها ماتتجاوز100 الى 150 بالكثير
4- فلتر الهوى قيمته ان كثر مايتعدى ال 70 ريال وكذالك فلتر المكيف من 50 الى 60 ريال اصلي
5- بالنسبة لتنضيف اقمشة الفرامل انا اول مرة اسمع فيه اللي اعرفه ان فيه تغيير لفحمات الفرامل اذا خربت وطبعا لها عمر معين حسب الاستخدام لكن بالغالب انها تتغير من 30 الى 40 الف كيلو والسعر لايتجاوز ال 300 او 350 ريال بالكثير للطقم كامل اصلي

يعني بالمختصر المفيد لوحسبنا التكاليف كلها ماتتعدى ال 700 ريال الكثير ،،

والله يعينك ويعين الجميع على جشع اغلب وكالات السيارات

لو عملتها خارج الوكالة ما تكلف ٥٠٠ ريال لكن اذا عندهم تسعيره ثابته الله يعينك ادفع وكان الافضل انك تسأل عن السعر قبل كل شي

أجل ١٢٠.الف كيلوو
بيغيرون المكينه

والله يالغالي اني في خاطري اشتري اوبتيما لكن يوم اتذكر وكيلها الجبر ومعاناتي معه في سيارة سابقه وسوء خدماته وعدم وجود قطع غيار اني اهون واشيل الفكره من راسي
تأكد يالغالي ان 90% من اللي غيرها لك لا تستحق التغيير ولكن سياسة حلب العميل متعود عليها الجبر

المفروض قبل ما تدخل سيارتك الوكالة تسألهم عن السعر وعن الي تشمله الصيانة

الوكالات خفّت عندهم المبيعات ورفعوا أسعار الصيانة لتغطية التكلفة

عموماً لا بد من الخطأ حتى يتعلم الواحد من أخطاؤه

Fanar1 
اخوي ترا صيانتهم غالية بس اصلا كل الوكالات غالية
بس انو بموضوع قطع الغيار فرق عن اول بكثير كل القطع تحصلها موجودة وقطعها مررررره رخيصه ترا

اللي اعرفه من حقك تعرف السعر قبل بشتغلون ..سالفة اسعارنا معروفه
هذي خلها لهم.. بلغ التجاره وارفع بلاغ يسوون صيانه بدون ابلاغك بالمبلغ

ليش ما سألت عن السعر قبل ما يشتغلوا فيها؟ وليش أصلا توديها الصيانة وعندك الكاتلوج؟ 1- الزيت أي مكان يغيره لك. وتقدر انت تشتري كرتون تخليقي وتغيره في أي مكان كل 10 الف كيلو في 5 دقايق.
2- سائل تبريد الرديتر يتغير اول مرة بعد 120 حسب الكاتلوج. ليش يغيروه؟ وليش انت ماتشتري السائل وتغيره ب 50 ريال كحد اقصى.
3- البواجي تعيش الى ٤٠ الف ولا ينقص عزمها 1 % عن تجربة يعني لا نقص عزم ولا دفدفة، بمجرد ماتدعس ثلث البنزين السيارة تفحط معك. ونفس الشئ لو تبغى تغيرها ب 45 قطع غيار و ب 50 ريال تكلفة اليد العاملة.
4- صرة الزيت. تكلفتها ب ١٠ ريال من قطع الغيار اصلية. تغيرها ببلاش. ومستحيل اللي عندك تكون خربت. يعني استغلوك فقط.
5- فلاتر هذه طبيعية. وتكلفتهم الاثنين ماتوصل 150 وانت تركبهم بنفسك.
6- تنظيف قماش هذا كلام فاضي.
من الاخير انت دفعت و ضيعت فلوسك وما تقدر تشتكيهم ولا شئ. الموضوع تم بموافقتك. انت تبغى خدمة VIP . وتحط رجل على رجال مايصير تتشكى.

اكثر اللي يلتزمون بالصيانه عند الوكالة مضطرين عشان الضمان
خصوصا" عشان كمبرسور المكيف لو قدر الله و ضرب
لو تحسب حق الصيانة الى ممشى ١٠٠ الف
ممكن يجيب لك قيمة كمبرسور جديد
غير زيت عن ون ستوب زيت فوكس ممتاز من تجربة
و الفلتر خذ حق النترا من وكالتهم ارخصو يركب و احتفظ بالفواتير
و اسحب على الجبر قفل فروعه بالقصيم سياراته غبرت رافع الاسعار و الصيانه
الناس تشتري من المعارض ارخص و الصيانه سيارة جديدة
اهم شي تغيير زيت القير اول مرة بعدين شيك على ممشى ١٠٠ الف تغيير سيور و فلاتر و الاقمشة حسب الاستهلاك

غاليه جدا
ولاحظ ما فيه تغيير زيت القير
المره الجايه اسأل عن التكلفه قبل تدخلها
نصيحه لك ولنا كلنا

الاخ الغالي كلفة صيانتك في الورش المحترمة اقل من ذلك بكثير وحط في بالك ان الوكالة تاخذ غالي لان عندهم رواتب وكلفة تشغيل عاليه من جميع النواحي

الحقيقه ان هذه اخر مرة فعلا في الصيانة لديهم . الحقيقه تم تغيير مرايا وقطعة التوجيه الكهربائي على حساب الضمان ولكن فعلا ما ضايقني ارتفاع السعر المبالغ فيه وايضا بالمقارنة بسيارات أخرى في وكالاتهم ما تصل هذه المبالغ نهائيا مثل الكروز .

الحقيقه ان هذه اخر مرة فعلا في الصيانة لديهم
. الحقيقه تم تغيير مرايا وقطعة التوجيه الكهربائي على
حساب الضمان ولكن فعلا ما ضايقني
ارتفاع السعر المبالغ فيه وايضا بالمقارنة بسيارات أخرى
في وكالاتهم ما تصل هذه المبالغ نهائيا مثل الكروز .

الاسعار مبالغ فيها .. الله يهديهم
من كم يوم رحت اسألهم عن تغيير الفحمات الامامية لكيا ريو
طلب الموظف 180 ريال كشفية و 386 ثمن الفحمات دون خراطة هوبات
يعني 566 ريال
أتمنى ان تصبح خدمة الوكالة مميزة مع اسعار معقولة
تقبل مروري ودمت بخير

كنت مثلك صعقت لما قالولي نفس المبلغ لكيا ريو وتركتهم وحولت على تويوتا ووصلت لصيانة ال٢٠ الف لليارس قالولي 1200 ههههه يعني من نقره لدحديره كلهم حراميه

لو تجمع مبلغ الصيانات تطلع الافات يطلع خلل ادفع اقل