ليش التفاعل في منتدى شبه معدوم

الصورة مو رضية تتحمل لكن مكان الشق الي بالرفرف صغير لكن قلت اغير الرفرف لانه مسمكر من اول وفيه معجون ومشوه

بالنسبة للتفاعل في المنتدى،، أغلب الأعضاء القدامى طلعوا من المنتدى لأسباب كثيرة،، المنتدى مر في فترة ما تصدق كثرة المشاكل والكلام البذيء وبعدها أغلب الأعضاء وأصحاب الخبره غادروا المنتدى بلا رجوع،، أما استفسارك عن تغيير الرفرف انا حصل لي حادث ب النترا وقصيت رفرف سيارة من التشليح مع جزء من الشنطة والحمد لله عدت في الفحص بدون أي مشاكل مع ان الحادث كان شديد والرفرف معدوم مع جزء من الشنطة

صادق اخوي محمد الشريف اول الاستفسارات ماتلحق عليها كثيييييره جدا وكان في اساطير لاكن مشو باقي منهم قليل الحين والظاهر انقطعو لاظروف الناس

بالنسبة للمنتدى
من حدثو موقع حراج صار لازم تدخل من القوقل هنا مباشره
مو من الموقع
زمان كانو الناس يجون هنا من خلال الموقع


وبالنسبه للرفرف الخلفي
نعم يباع قص بالوكاله 
انا شاري رفرف كامري ٢٠١٦ خلفي قبل اسبوع بـ ١١٥٠ ريال

تودي للوكاله او السمكري يلحمه ويصنفره و يصبغه

الموقغ تغير السب والكلام البذي كثير اي واحد بس تطرح رايك جاء يسن ويشتم ويشكك وكأنه داخل حرب
والمصيبه التقييم الناس توزع تقييم سئ بدون سبب عشان كذا صار ابعد تسلم

فعلا الموقع تغير كثير اول في تفاعل بس مشاكل وكل واحد يفرض رائيه زي امثال التركي
كان فيلسوف
في عضو احترمه وقديم اسمه الرفاعي وفي كثير بس غابو مدري يمكن لقو مكان ثاني
اغلبهم مريح راسه ومتكي بتويتر او اليوتوب
عن نفسي انا قديم بس اذا قدرت اساعد ساعد بدون تردد

اخوي فهد اتفق معك الموقع تغير كثير
التركي كان يفيدنا مهما كان ويش صار لكن هو كان يزعل اذا نزل موضوع يعطونه ديس لايك ويتقفل حسابه
ويروح عليه الموضوع وعلينا يروح الله يزينها يارجال

وعليكم السلام ورحمة الله وبركاته هلا فيك ياغالي
والله شوف الأسباب كثيرة مثل قول الشاعر: تعددت الأسباب والموت واحد.

عندك السبب الأول: كثر المهاترات بين الأعضاء والمتسبب فيها الأعضاء المعتلين نفسياً المتفلتين على مواقع التواصل مو بس هنا
وهذولي مكانهم عيادة نفسية مو هنا، يبون يفرضون وجهة نظرهم غصب طيب!

والسبب الثاني: كثرة الديسلايك الإستفزازي وله علاقة بالسبب الأول.
السبب الثالث: حذف ايقونة المنتدى من الصفحة الرئيسية لموقع حراج وحتى هذا السبب اعتقد له علاقة بالأسباب المذكورة سلفاً.

السبب الرابع: ظروف الحياة ومشاغلها من وظيفة أو زواج أو مرض أو وفاة سواء للعضو نفسه أو أحد المقربين
يعنى أنا كمثال توفى شخص لي قريب لي وتعبت نفسيتي وقاطعت كل مواقع التواصل لفترة من الزمن.

السبب الخامس: عدم التفاعل بحد ذاته بين مجموعة مُعدي ويقتل الحماس داخل الشخص المتفاعل
والصراحة المنتديات بشكل عام بدأ التفاعل يموت فيها

وبخصوص استفسارك عن الصدمة في سيارتك،، نعم الرفارف الخلفية تباع كقطع منفصلة ويتم قص الرفرف القديم

وتلحيم الرفرف الجديد،، وما دام قدروه لك برفرف جديد معناها الرفرف تضرر بشكل واضح وراح يتعبأ معجون
إذا ما تغير، والقص مهو عيب كبير إذا كان شغل نظيف وترا الرفرف يُباع كقشرة خارجية يتم تلحيمها بالهيكل

وليس الرفرف كاملاً مع الهيكل! القص في الهيكل من الداخل هو اللي ممكن يفشلك الفحص فيه
لأنه أي لعب في هيكل السيارة ممكن يأثر على توازن السيارة وثباتها على الطريق

وترا في سيارات كثير تمشي في الشوارع ومن بينها سيارات فخمة والقشرة الخارجية للرفارف مقصوصة ولا تبين